Korpuskeltheorie

D Korpuskeltheorii (au Emissionstheorii, Emanationstheorii, ballistischi Liechttheorii oder Korpuskulartheorii) isch e füsikaalischi Theorii, wo vor allem em Isaac Newton zuegschriibe wird. Noch dere Theorii bestoot s Liecht us chliinste Däili bzw. Korpuskel (Körperli). D Korpuskeltheorii isch im 19. Joorhundert vo dr Wälletheorii vom Liecht abglööst worde, aber sit dr Fotoonetheorii vom Einstein (1905) schribt mä nä däilwiis wider korpuskulaari Äigeschafte zue. Wil die ursprüngligi Emissionstheorii sich mit em Relatividäätsbrinzip verdräit und eso mit em Michelson-Morley-Experimänt, het mä am Aafang vom 20. Joorhundert sonigi Modäll wider afo diskutiere und als Alternative zur Relatividäätstheorii in Bedracht zooge. In dr Emissionstheorii weer aber d Liechtgschwindigkäit vo dr Gschwindigkäit vo dr Liechtkwelle abhängig, und das cha mä mit e Hufe andere Experimänt äidütig widerleege. Doorum cha mä d Emissionstheorii nüme as ärnsthafdi Alternative zur Relatividäätstheorii in Bedracht zie.